Pag-abli ug dugang karsada sa siyudad naaprobahan

CEBU, Philippines — Gilihok na karon ang proseso alang sa pag-recover sa mga karsada ingon man sa pag-abli og dugang karsada sa dakbayan sa Sugbo aron dunay laing alternatibo nga mga rota pagsulbad sa kahuot sa dagan sa trapiko.

Gipadayag ni konsehal Jerry Guardo, chairman sa Committee on Infrastructure sa konseho sa dakbayan nga mao kini ang naaprobahan sa iyang mga proposal.

Ang giingong road opening ug recovery mao ang access road sa Hipodromo paingon sa Cebu Business Park.

Gawas niini gisugyot usab ni Guardo ang creek rehabilitation diha sa Barangay Carreta ug Tejero.

“Our City has been experiencing a growing aggravation of traffic congestion and it will become worse in the coming months and years owing to the inevitable increase in vehicles while our road capacities remain the same,” suma pa ni Guardo sa iyang privilege speech.

Nagkanayon si Guardo nga ang mao niyang sugyot naggumikan sa nahitabo niadtong tuig nga wa pa ang pandemic diin ang barangay Hipodromo naigo sa daku nga sunog ug dunay kakuwang sa mga alternative exit roads.

Gidugang niya nga sa ilang initial survey, nasuta nga dunay existing road nga nasuta nga usa ka “abandoned road” apan gipuy-an sa mga informal settlers.

Dugang pa ni Guardo, nga sa higayon nga marekober, kini nga karsada maoy magdugtong sa MJ Cuenco paingon sa Ayala.

“So our proposal is to have these roads in MJ Cuenco, we have to construct and build a new road that will connect directly to Ayala, so this will serve as an alternative exit road,” suma ni Guardo.

Samtang gisugyot usab ni Guardo ang Rehabilitation and Re-activation sa natural waterways subay sa creek sa Tejero ug Carreta.

Suma pa niya, mao kini ang makahatag ug hingpit nga kasulbaran sa dugay na nga problema sa pagbaha sa nahisgutang lugar ilabi na sa sitio Kalapukan. — /MEL (BANAT NEWS)