Skate park sa siyudad sa Talisay buksan karong Abril 1
CEBU, Philippines — Gipahibawo ni Talisay City mayor Gerald Anthony “Samsam” Gullas nga buksan na karong tuiga ang skate park sa Dakbayan sa Talisay.
Suma pa ni mayor Gullas nga dili lang skate park nga gidesinyo sa world renowned designer Kenneth Cobonpue ang makita diha sa compound sa Talisay City Hall.
Lakip nga makita ang children’s playground sa pikas habig sa proyekto.
Naa sab kini gitagana nga food court alang sa pamilya nga mopalabay sa oras. Si Gullas niingon nga naghinam-hinam na siya nga ablihan kini ngadto sa publiko.
Sa ilang sabot ni kongresista Rhea Gullas sila nagkauyon nga buksan kini human sa Semana Santa sa Abril 1 ning tuiga dungan sa ilang pagpahigayon sa Gullas Cup Skateboard Competition.
Dugang pa ni Gullas nga mao na kini ang higayon sa mga mahiligon sa skate nga makapraktis aron mapalambo pa ang ilang abilidad sa maong matang sa paugnat sa kusog.
Gipahibawo usab sa mayor pinaagi sa iyang facebook page ang laing daku nga proyekto sa siyudad nga mao ang 2-storey Talisay Sports Center.
Motanyag kini og sports training sama sa Basketball, futsal, volleyball, badminton, table tennis, taekwondo, karatedo, arnis, boxing, gymnastics, sepaktakraw, dancesports ug daghan pa.
“Mao gyud ni atong gipangandoy para sa atoang mga Talisaynon athletes dili na muadto pag layo para lang mo train kay naa naman tay atoang kaugalingong training center paras matag sports enthusiast.” Segun sa FP post ni Gullas
Suma pa sa mayor nga na andam na usab ang budget alang sa ilang kaugalingon nga track oval, swimming pool ug soccer field.
Karong tuiga himoon nila ang groundbreaking sa gikahinaman nga Talisay Track Oval, Swimming Pool ug Soccer field diha sa Talisay Central School sa Poblacion. (BANAT NEWS)
- Latest
