Sagunsong anti-illegal drugs operations, lima nadakpan

CEBU, Philippines — Usa ka  34 anyos nga lalaki nadakpan sa drug bust nga gihimo sa mga sakop sa City Drug Enforcement Unit sa Cebu City Police Office diha  sa Sitio Ba-od Miller, Barangay San Nicolas Proper sa Cebu City.

Ang 34 anyos nga si Lorenzo Manansala Borlasa nakuhaan og 325 grams nga shabu nga mobalor og P2.2 million.

Samtang usa sab ka High Value Individual ang nadakpan sa kapolisan sa Mandaue City Police Office  niadtong Pebrero 9, 2024 ug nakuhaag 60.24 gramos nga gituhuang shabu nga  gibanabanang P409,632.

Ang suspek giila nga si Christian Maurin Bagahansol, 26, residente sa Sitio Kamanggahan, Brgy. Tabok, dakbayan sa Mandaue.

Nahitabo ang buy bust operation niadtong Biyernes sa gabii pasado alas 10:31 diha sa Sitio Sto. Niño sa maong barangay pinanguluhan ni Police Major Jade Tampus Sumugat, inubanan ni Police Lieutenant John Aldrin Baligad, ug sa mga sakop sa Police Station 3.

Samtang duha sab ka mga giilang HVIs ang nadakpan sa Lapu-Lapu  City Police (LCPO) ug nakuhaan sila og 45  gramong shabu  nga nagkantidad og P306 mil.

Ang  mga sakop  sa City Intelligence Unit (CIU) nga gipangulohan ni Police Major Airbert Jay  Samson ug City Drug Enforcement Unit (CDEU) nga gipanguloha ni Police  Lieutenant Colonel Dindo Juanito  Alaras uban sa PDEA 7 nagpahigayon og buy bust operation nga miresulta  sa pagkasikop sa usa ka gilla lamang nga alyas "Eber" (apilyido gipugngan) 30 anyos nga molopyo sa B-16, Univille sa Barangay  Kasambagan sa Siyudad sa  Sugbo.

Nasakmit gikan sa maong dinakpan ang 25  gramo nga shabu nga balor P170 mil.

Laing nadakpan tungod sa ilegal nga drugas sa mga sakop sa Presinto 4 sa LCPO nga ubos sa pagdumala sa hepe nga si Police Major Judith Besas ang pusher nga si alyas Lea nga taga Sitio Matab-ang, Barangay  Marigondon sa maong dakbayan nga nakuhaan og 20 gramong shabu nga nagkantidad og P136 mil.

"This one-day accomplishment is a testament to PRO7's huge progress in crafting new anti-drug strategies in the pursuit of lawless criminals and keeping our community safe and drug-free motivated by BIDA Program of Atty. Benjamin Abalos Jr. and 5-Focused Agenda of the PNP," sigon ni Police Regional Office-7 Director Brigadier General Anthony Aberin. -  Paolo Anton Nabaja