Naka-hit and run kang larumbe gikasohan

CEBU, Philippines — Napasaka na sa Cebu City Police Office (CCPO) ngadto sa Cebu City Prosecutor's Office ang kasong murder batok driver sa Sports Utility Vehicle (SUV) nga dunay plaka nga YKK 161 nga maoy gitumbok nga naka hit and run kang Jeslar Uriel Larumbe diha duol sa Redemptorist Church, Barangay Kamputhaw, siyudad sa Sugbo.

Si Police Colonel Ireneo Dalogdog, City Director sa Cebu City Police Office miingon nga ang maong drayber maoy prime suspect  tungod kay siya'y gitudlo sa mga saksi ug ebidensiya nga ilang nakuha.

"Siya prime suspect nga gitudlo sa atong mga testigo uban usab sa atong mga ebidensiya nga atong nakuha," sigon ni Dalogdog.

Wala una nganli sa kapulisan ang suspek apan gikatakda nga mohimo sila og presentasyon sa tanang nakuha nila nga detalye may labot sa insidente.

Si Police Regional Office(PRO)-7 Spokesperson Lieutenant Colonel Gerard Ace Pelare miingon lig-on ang mga ebidensiya nga nakuha sa kapulisan nga nahimong yawe aron matumbok gyud ang suspek sa krimen.

"They have already established the identity of the suspect, they have CCTVs, they have conducted tedious backtracking of CCTVs, we have eyewitnesses nga nag istorya kung kinsa ang suspect unya how the incident came about," ni Pelare pa.

Dili lang ordinary testimonials evidence, backtracking sa CCTVs ang ebidensiya nga gihuptan sa CCPO apan apil na sab ang scientific evidence pinaagi sa pagpaubos sa sakyanan macro-etching.

Gipasaka ang kaso pinaagi sa regular filing sanglit dili naman mamahimong dakpon ang suspetsado.

Nagpasabot kini nga moagi ang maong kaso sa preliminary investigation ug hatagan og panahon nga makatubag ang giakusahan ug kung dunay makita nga probable cause ang piskalya ila kining isang-at sa korte.

"We will not compromise the quality of investigation just because there is a pressure from the public, we will make sure that the one gthat will be charge is the one who committed the offense," ni Pelare pa. —IBM BANAT NEWS