Sunog miulbo sa Tisa, P1.7 milyones ang gibiling danyos

CEBU, Philippines — Dul-an sa P1.7 milyon ang danyos sa sunog nga niulbo sa may Sitio Caduloy, Barangay Tisa ning Dakbayan sa Sugbo, alas 9:14 sa buntag niadtong Lunes sa buntag.

Ang sunog naglambigit og residential houses nga giingon iya ni Crisencia Seseban. Ang sunog giisa lang sa 1st alarm ug hingpit nga na fireout alas 9:50.

Gibana-banang moabot ngadto sa 1,650.000 pesos ang dayon diin walay gikataho nga nakalas apan tulo ang naangol nga sila si Christian Omamban nakaangkon og laceration sa iyang duha ka kamot, Gwendel Ciriaco laceration sa iyang wala nga paa ug Jonathan JAbalde, laceration sa iyang wala nga abaga.

Siyam ka mga panimalay ang apektado sa pag-ulbo sa maong sunog diin 1 ang partial nga nakan-an ug walo ang hingpit nga naugdaw nga gipuy-an tanan og 15 ka pamilya.

Usa sa mga problema nga nasugatan sa mga miresponde, walay alternatibong maagian ang mga bombero padung sa fire scene gawas Pluto Street nga kun adto ang mga firetrucks mabara gyud tanan ug wala nay maagian pagawas ug ma-trap na ang tanan.

Adunay maagian nga gamay nga agianan para sa tawo apan magtakilid aron makalusot.

Gusto karon ni Tisa Barangay Captain Adda Lapeña nga mabuhatan og laing alternatibong dalan ang maong dapit nga pwedeng malutsan sa mga residente.

"Naay power ang Barangay...gusto nako hatagan ni og dalan ang mga tawo nga mihangyo kay adto ra man sa Pluto, kuyawan ko adto masunog una wala na sila'y kadaganan sa gawas, ma-trapa sila," ni Lapeña pa. (BANAT NEWS)