Bag-ong nakagawas sa prisohan nabalik na usab sa prisohan

CEBU, Philippines — Usa ka lalaki kinsa bag-o lang nakagawas gikan sa prisohan nabalik na usab sa prisohan human kini nasikop atol sa buy-bust operation nga gipahigayon sa Regional Police Drug Enforcement Unit-7 niadtong Huwebes sa gabii diha sa Sitio Mahayahay, Barangay Guadalupe, Siyudad sa Sugbo.

Nangulo sa maong operasyon si Police Lieutenant Colonel Jomar Dela Cerna uban ni Police Captain Bonifacio Ta ola.

Ang suspetsado mao si Eleuterio Ragasajo Mojado, alyas "Terio", 53-anyos residente sa maong dapit. Gikataho nga si Mojado nadakpan na niadtong tuig 2018 ug nakagawas niadtong tuig 2020 sa kasong paghupot og armas nga dili lisensiyado.

Ug sa tuig 2021 nadakapn na usab kini sa kasong pagpamaligya og ilegal nga drugas og nakagawas kini niadto lang Enero 10, 2024.

Matud sa kapolisan nga sa paggawas ni Mojado ilang na-monitor nga nibalik kini sa ilegal niini nga binuhatan hinungdan nga gipanid-an nila kini sulod sa usa ka semana sa wala pa sila mopahigayon og operasyon batok sa suspetsado.

Nasuta sa kapolisan nga si Mojado maka-dispose kini og 100 gramos nga shabu matag semana.

Nasakmit sa kapolisan gikan sa suspetsado ang lima ka putos nga adunay sulod nga lima ka gramong shabu matag usa niini ug usa ka putos nga adunay sulod nga 25 gramong shabu ug 50 gramong shabu nibalor ngadto sa P340 mil.

Ang suspetsado nadetiner karon sa RPDEU detention cell ug gikatakdang pasakaan og kasong kalapasan sa Sec.5 og 11 ART ll sa Akta Republika 9165 kun  Comprehensive Dangerous Drugs Act of 2002 .   BDB BANAT NEWS