Wala mobayad sa utang gipusil sa giutangan

CEBU, Philippines — Usa ka lalaki kinsa giingong wala mobayad sa utang ang gipusil sa iyang giutangan niadtong Lunes sa buntag diha sa Purok Kalabasa, Barangay Pitalo, Lungsod sa San Fernando.

Human sa pagpusil sa suspetsado ngadto sa biktima niunay usab kini og pusil sa iyang kaugalingon kinsa ang duha parehong nalandig sa tambalanan.

Ang biktima mao si Catherine Caballero Dioba, 28-anyos, adunay kapuyo, lumulupyo sa maong dapit.

Ang suspetsado mao si Martin Juezan Basco, 76-anyos, residente usab sa nahisgutang lugar.

Si Police Major Mark Anthony Villanueva, hepe sa kapolisan sa Lungsod sa San Fernando nagkanayon nga daan na nga adunay kasuko ang suspetsado ngadto sa biktima tungod kay wala kini mobayad sa giutang niining kwarta.

Nasayran nga si Basco adunay negosyo nga pautang og kwarta ug ang biktima mao ang iyang gitahasan nga mangita og kostumer nga moutang ug mao usab kini ang  tigkolekta sa bayad sa ilang mga kostumer.

Apan giingong wala na panumbalinga sa biktima ang suspetsado kong paninglon kini sa nautang niini nga kwarta.

Nasayran nga kanunay nga makita sa suspetsado ang biktima nga makig-inom sa ilang silingan hinungdan nga nasuko kini ug giingong nisulti sa iyang asawa nga patyon niya ang biktima apan wala lang kini panumbalinga sa asawa sa pagtuo nga nagbinuang lang ang iyang bana.

Niadtong Lunes nakita sa suspetsado nga nakig-inom na usab ang biktima sa ilang silingan ug sa walay daghang pangutana gipusil niya kini.

Ang biktima natapsingan sa bala diha sa iyang likod ug daling nidagan paingon sa ilang balay.

Ug gumikan sa kahadlok sa suspetsado nga dakpon nipauli usab kini sa ilang balay ug nagpusil sa iyang ulo apan wala nakabuto ang armas nga gigamit niini.

Gipuntariya sa suspetsado ngadto sa iyang dughan ang pusil ug gikablit na usab ang gatilyo ug didto na nibuto ang pusil. Ang suspetsado kinsa nakaangkon og samad pinusilan sa dughan ug ang biktima parehong gidala ngadto sa tambalanan. BDB BANAT NEWS