Na-‘hit’ sa police clearance gidakop

CEBU, Philippines — Gidakop ang usa ka ginang sa Candijay Police Station sa Probinsiya sa Bohol atol sa iyang paglukat og police clearance niadtong Miyerkules.  Ang 41 anyos nga ginang taga Purok 4, Barangay Anoling, Lungsod sa Candijay sa Lalawigan sa Bohol kinsa nag-atubang og kasong qualified theft.

Sigon ni Police Captain Albert Sator, hepe sa Candijay Police Station nilukat ang ginang og police clearance apan na-hit kini.

Nasuta nga duna kini nagung-ong nga warrant of arrest sa kasong qualified theft didto sa General Mariano, Cavite.

Ang Ginang sa iyang bahin mitug-an nga wala siya masayod nga duna siya'y kasong giatubang apan siya miangkon nga nakatrabaho siya didto niadtong 2014 sa usa ka lending company.

Mao kini iyang gituohang nipasaka og kaso kaniya gumikan matod pa nakadispalko og dakong kantidad nga kwarta.  Matod niya nga kaduha ka higayon na siya nga nagkuha og police clearance apan karong ikatulo nga paglukat palang niya siya na-hit.—  IBM (BANATNEWS)