Nagdala dala og armas nasikop sa Talisay

CEBU, Philippines —  Nadakpan ang usa ka lalaki human kini gireklamo nga magdala-magdala og armas didto sa Barangay Tanke, Dakbayan sa Talisay usa ka adlaw sa wala pa ang Pasko.

Giila ang gidakop nga mao si Joseph Daan, 39 anyos nga nagpuyo sa maong lugar.

Ang mga nagpakabana nga molupyo maoy nitawag og pakitabang sa kapolisan.

Ilang gihulagway nga naglakaw-lakaw si Daan nga armado nga nakamugna og peligro kung aduna siyay ma interesan.

Ang mga niresponde nga polis malampuson nga midakop ni Daan ug wa na sab kini misukol pa.

Apan ang dinakpan nirason nga nagdala-dala siya og armas aron maprotektahan ang iyang kaugalingon human siya gikulata sa iyang mga silingan sa milabay nga mga adlaw.

Walay dokumento sa armas si Daan hinungdan nga gibalhug kini sa bilangguan.  MEL (BANATNEWS)