Drayber sa Pajero nakasinati og hypoglycemia —PNP
CEBU, Philippines — Usa ka Pajero ang nidaro sa pipila ka mga sakyanan og bisikleta diha sa dalan FF. Zeullig ug A. Soriano sa Barangay Centro, Dakbayan sa Mandaue niadtong Martes sa hapon.
Ang drayber sa maong Pajero giingong nakasinati og sobrang pag-ubos sa iyang sugar level o hypoglycemia.
Ang video sa insidente unang nag-viral diin gituohan nga hubog ang nagmaneho sa maong sakyanan tungod kay nagpataka lang kini og dasmag sa bisikleta ug ubang mga sakyanan.
Ang tigpamaba sa Mandaue City Police Office Police Lieutenant Colonel Rodulf Franc Oriol nibutyag nga dili hubog ang nagmaneho sa maong Pajero apan nawad-an kini sa iyang panimuot tungod sa nasinati niini nga hypoglycemia.
Matud ni Oriol nga ang maong drayber usa ka 73-anyos nga taga Lungsod sa Liloan ug anaa pa kini karon sa tambalanan ug nipasalig kini uban sa iyang pamilya nga moabaga sa danyos ngadto sa mga nabiktima.
Atol sa pagkabangga sa maong drayber wala hinuoy gikataho nga naangol apan adunay mga sakyanan nga nangaguba. (BANAT NEWS)
- Latest
