P35 mil nga bonus nadawat sa mga kawani sa Talisay City Hall

CEBU, Philippines — Nakadawat na sa ilang bonus ang mga regular nga empleyado sa City Hall sa dakbayan sa Talisay.

Si Talisay City mayor Gerald Anthony “Samsam” Gullas nibutyag nga labing dako kini nga bonus nga miabot og P35 mil nga nadawat sa mga kawani sa siyudad.

Ang Collective Negotiable Agreement (CNA) maoy unang nadawat sa mga regular nga kawani sa sayo pa sa buwan sa Disyembre.

Aduna pa gyud silay madawat nga P20 mil ka pesos sa sunod nga semana pinaagi sa Service Recognition Incentive.

Samtang matud pa usab ni Edgar Mabunay, city budget officer sa Talisay nga di angayan nga maguol ang mga job order nga kawani kay sila makadawat sab og pinaskohan.

Asoy pa ni Mabunay nga ang pinakagamay nga madawat nila mao ang kantidad nga P3mil ka pesos.

Bisan pa og usa ka buwan lang nga nakatrabaho ang JO mahimo na dayon sila makadawat sa bonus.

Ang Talisay City Hall adunay 420 ka mga regular nga kawani ug kapin sa 1,800 ka mga job order nga kawani. (BANAT NEWS)