Magis Eagles milupad nga kampiyon gihapon
Misakmit sa ikapitong korona sa CESAFI basketball
CEBu, Philippines — Ang Sacred Heart School-Ateneo de Cebu (SHS-AdC) Magis Eagles mitagak og 10-0 nga bomba sa pinal nga kuwatro minutos aron patikangkangon ang University of the Visayas (UV) Baby Lancers, 58-55, sa tinagakay nga duwa sa ilang best-of-three finals ug pagpabiling kampiyon sa juniors division sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Biyernes, Disiembre 15, didto sa Cebu Coliseum.
Si Jared Bahay mikadlit og 14 puntos, si Froiland Maglasang mi-iskor og 11 samtang sila si Alden Cainglet, RJ Dacalos, ug Nikolas Yu miamot og otso puntos matag usa alang sa Magis Eagles nga misakmit sa ikatulo nilang sunod-sunod nga korona sa upat ka tuig.
Naghari sila niadtong 2019 ug ingon man sa comeback season sa liga sa miaging tuig aron birahon ang ikaduha nilang dungog isip grandslam champion. Una kini nilang nakab-ot niadtong 2014 ngadto sa 2016.
Sa kinatibuk-an, ang Magis Eagles milangkat sa ikapito nilang titulo sukad sa makasaysayanon nilang kampanya niadtong 2012, tanan ubos sa paggiya ni coach Rommel Rasmo, aron tablahon ang rekord sa UV isip labing daogan nga mga high school teams sa 23 ka tuig nga kasaysayan sa liga.
"I'm speechless," matud pa ni coach Rasmo. "I think this victory is very special because we faced a lot of challenges. Talagang pinaghirapan namin 'to." "On the other hand, I have to salute UV and their coaching staff. They bring out the best in us and to be honest, they really outcoached us," dugang pa ni Rasmo. "But we just played the Magis Eagles way and thankfully the boys executed what was expected of them."
Tam-is kaayo ang maong kalamposan alang sa Magis Eagles ilabi na kay ila kining natagamtaman human sila misukarap gikan sa 19 puntos nga labaw, 27-8, sa sayong bahin sa ikaduhang kuwarter.
Ang Baby Lancers ni coach Ronald Bucao milusad og madasigong resbak dayon na ngadto sa pag-ilog sa labaw, 49-46, sa naghinapos nga bahin sa duwa. Apan sila si Dacalos, Bahay, Jelomar Rota, ug Yu midagkot og nagkayong 10-0 rally aron paginhawaon og lawom ang Magis Eagles uban ang siyete puntos nga bentaha, 56-49, sa nahibiling 1:21 sa aksiyon. Ang breakaway layup ni Maglasang sa pinal nga 41 segundos maoy nagsilyo sa dalaygon nga kadaogan sa Magis Eagles.
- Latest
