Retiradong heneral patabangon sa peace and order

CEBU, Philippines —  Aron palambuon pa ang sitwasyon sa seguridad sa siyudad sa Sugbu, si Mayor Michael Rama nikuha kang retired general Melguiades Feliciano nga motabang sa peace and order sa dakbayan.

Si Rama kinsa wala dinhi sa siyudad dihang nahitabo ang mga pagpanulis ug pagkapatay sa usa ka polis sa buybust operation sayo ning buwana miangkon og kaakohan sa mga panghitabo sa siyudad.

Kini ang gibutyag sa mayor atol sa gipahigayon niini nga press conference via zoom. Gikuha niya si Feliciano kinsa mao na sab karon ang Chairman sa MCWD  pagtabang aron palambuon ang seguridad sa siyudad  tungod sa iyang military background.

Si Rama nangayo og pasaylo sa publiko sa mga nahitabong dili maayo sa siyudad ning nanglabay nga mga adlaw.

Gimando karon ni Rama ang pagsulbad sa tanang mga nahitabong krimen gikan sa pagkapatay polis, tulis sa Oro Sugbu ug ang paglungkab sa buhatan sa  CCENRO diha sa City Hall.

Gusto ni Rama nga lingkuran nilang Feliciano, Atty. Collin Rosell ug Phillip Zafra ang peace and order sa siyudad.

Naglaum si Rama nga sa iyang pagbalik gikan abroad, dili na hot pursuit operation gihapon ang gihisgutan sa kapulisan kondili solusyon ug konklusiyon na.

Ang mayor nitug-an nga ang peace and order sa siyudad dili lang trabaho sa kapulisan ug gobiyerno kay apil niini ang katawhan pagtinabangay para sa kahapsay ug kalinaw sa tanan.

Si Feliciano nitug-an nga andam siya sa tahas sa mayor ug sugdan na niya ang trabaho bahin ani. Sa laing bahin, ang Konseho sa Dakbayan sa Talisay subling nanawagan sa mga balay patigayon sa siyudad nga susihon pagbalik ang ilang seguridad.

Si Konsehal Gail Restauro, chairman sa committee on Peace and Order nipahinumdom kanila sa ordinansa nga gikinahanglang dunay CCTV cameras ang mga balay patigayon sa dakbayan.

 Matud niya, angay magmatngon ang tanan nga naghuwat lang og  binta ang mga dautang elemento aron mamiktima.

Ang kapolisan sa Talisay adunay mga CCTV camera nga giplastada sa mga lugar nga tapukanan sa mga tawo ug dunay mga alarm buttons ang mga establisamento nga konektado sa police station. - Rowena D. Capistrano ug Gabriel Bonjoc, IBM (BANATNEWS)