Sobra sa 600 ka kawani sa CCTO gipaubos sa drug test
CEBU, Philippines — Sobra sa 600 ka kawani sa Cebu City Transportation Office (CCTO) ang gipaubos sa kinalit nga drug test sa Cebu City Office for Substance Abuse Prevention (COSAP)kagahapon sa buntag diha sulod sa Sawang Calero Gym.
Matud ni Raquel Arce, pangulo sa CCTO nga nakita niya nga kinahanglan nga limpiyohan ang iyang organisasyon hinungdan nga gipahigayon ang kinalit nga drug test sa tanang trabahante.
Base unya sa resulta sa maong drug test masuta niya kong kinsa nga mga empleyado ang angayan nga magpabilin ug palagputon.
Si Arce nagkanayon nga ang mapositibo sa drug test iyaha kining ipaubos sa proseso ug lakip na usab ang rekomendasyon for dismissal tungod kay makadaot kini sa organisasyon ug makatakod usab unya kini ngadto sa uban.
Matud usab ni Arce nga walay nakahibalo sa mga trabahante nga adunay ipahigayon nga drug test hinungdang iyaha usab nga susihon kong adunay absent sa maong drug test.
Naglaom si Arce nga walay magpositibo nga mga sakop sa CCTO tungod kay ang magpositibo mag-atubangan kini og silot sa nahimo nilang kalapasan.
Nasayran nga ang drug test nga gipahigayon kagahapon sa buntag maoy una karong tuiga. BDB (BANATNEWS)
- Latest
