Ordinansa alang sa seguridad sa establisamento susihon
CEBU, Philippines — Susihon pag-usab sa Committee on Peace and Order sa Cebu City Council ang mga ordinansa nga nagsiguro sa parameter sa seguridad sa mga establisamento nga kini mapatuman human sa nahitabong pagpanulis sa usa ka pawnshop sa Colon, Cebu City.
Sa pakighinabi sa media kagahapon (Lunes), ang Chairman sa Committee for Peace and Order, nga si Konsehal Philip Zafra niangkon nga naalarma sila sa panghitabo sa dakbayan.
“Mao ng nagpatawag dayon si Mayor og meeting, ga zoom meeting mi, tanang station commanders, of course the head sa CCPO, who really addressed this case at once nga masulbad dayon,” sigun ni Zafra.
Ang mga suspetsado sa pagpanulis sa pawnshop nakuhaan sa CCTV nga armado og high-powered firearms niadtong Sabado sa buntag. Ning maong panghitabo, si Zafra niingon nga panahon na nga tukion pag-usab ang mga ordinansa sa pagpatuman sa mga parameter sa seguridad.
Matud ni Zafra, makigtagbo sila sa Philippine Association of Detective & Protective Agency Operators (PADPAO) ug mga head of security sa mga establisamento aron hisgotan kini nga mga butang.
Lakip sa mga kasamtangang ordinansa nga gihisgotan ni Zafra mao ang pagbutang og alarm device sa mga establisamento lakip na ang mga pawnshop.
“Kanang mga alarm, kanang mga establishments especially mga pawnshop, naa gyud na silay mga device na connected sa kapolisan, ikapila nata nag remind nila niini, and even kaning mga jeepneys or PUJs ato sad na sila apilon, kay naa tay ordinansa ani before,” matud ni Zafra.
Gipadayag usab niya nga ila sab susihon ang pag implemetar sa pagbutang og blue nga suga sa ibabaw sa mga jeep ug taxi nga makapaalerto sa mga tawo sa panahon sa mga insidente sa krimen.
Sumala sa gimando ni Cebu City Mayor Michael Rama, si Zafra nipalanog nga si Police Lt. Colonel Jannet Rafter, Cebu City Police Deputy City director for operation nisubli niining deployment ug gihingusgan ang roving patrols. (BANAT NEWS)
- Latest
