Pagsulod sa manok ug live birds gihigpitan sa probinsiya sa Sugbo

CEBU, Philippines — Laing kamandoan ang giluwatan ni Gobernador Gwendolyn Garcia nga nagregulate sa pagpasulod og mga poultry o manok ug live birds sa Probinsya sa Sugbo pagpanalipod sa poultry industry sa Probinsya batok sa Avian Influenza (AI).

Ubos sa maong executive order gidili ni Garcia ang pagpasulod sa mga live birds, apil na niini ang mga piso, pullets, pato, quails, game fowls, pigeons, ug pet birds gikan sa mainland Luzon, Visayas ug Mindanao ug mga lugar o nasud nga apektado sa  AI.

Gikinahanglan ang pagsumitir sa mga rekisitos sama sa veterinary health certificate nga giluwatan sa Provincial Veterinarian sa gigikanan nga Probinsya; veterinary shipping permit; ELISA/HI/ RT-PCR Negative Laboratory Test Result sa Avian Influenza; sertipikasyon gikan sa Provincial Veterinarian nga walay Avian Influenza outbreak nga nahitabo sa ilang lugar sulod sa pito ka adlaw sa wala pa ang shipment.

Alang sa mga wild birds, kinahanglan ang Local Transport Permit (LTP) nga giisyu sa Department of Environment and Natural Resources (DENR).

Ang produkto sa manok hinoon ang gitugot nga mapasulod sa Probinsya sa Sugbo apan kinahanglan makakuha ang shipper sa mga gikinahanglan nga rekisitos, sama sa Meat Inspection Certificate gikan sa National Meat Inspection Service (NMIS ug Veterinary Shipping Permit.

Ang giproseso nga poultry ug de lata nga karne sa manok kinahanglan adunay License to Operate ug Certificate of Product Registration gikan sa Food and Drug Administration.

Ang mga itlog, balut ug uban pa kinahanglan usab adunay Veterinary Health Certificate gikan sa Provincial Veterinarian sa origin province, veterinary shipping permit ug negative nga AI test result.

Sa mga poultry by-products segun sa EO ni Garcia “all chicken must be dry, placed in sacks, and covered with plastic and canvass prior to transport”.

Ang transhipment sa mga live birds gikan sa mga lugar nga dili apektado sa AI ang tugotan nga makasulod sa pantalan ug tugpahanan sa Sugbo.

Gimandoan ni Garcia ang mga barangay animal health aides nga mag-andam ug motabang sa pagmonitor sa ilang tagsa tagsa ka lugar. — MEL (BANATNEWS)