GMRC ibalik na sa bag-ong curriculum

CEBU, Philippines — Lima ka mga skwelahan sa Probinsya sa Sugbo ang apil sa pilot o mag-una nga tunghaan nga mopatuman balik sa Good Manners and Right Conduct (GMRC) subject sa basic education.

Kini ang Tindog Integrated School sa Medellin, San Fernando North Central Elementary School, Tabogon Central Elementary School, Dumanjug National High School ug Liloan National High School.

Matud sa Cebu provincial school division superintendent nga si Dr. Senen Paulin nga maapil na ang GMRC sa bag-ong curriculum nila.

“Ang GMRC ibalik na; dili lang kay i-integrate siya sa Values Education, but it will be taught of as a separate subject,” matud ni Paulin atol sa Caravan of Services niadtong Nobiyembre 11 sa lungsod sa Consolacion.

Sumala sa superintendent nga kabahin kini sa MATATAG Curriculum program sa Departamento sa Edukasyon nga gilusad ni Vice President ug DepEd Secretary Sara Duterte niadtong bulan sa Agosto karong tuiga isip revised curriculum alang sa Kindergarten ngadto Grade 10.

Sumala sa Capitol Information Office nga moepekto kini sa school year 2024 - 2025.

Kini gihimo aron makatabang sa hagit karon nga giatobang sa DepEd sa kasamtangang K-12 curriculum, sama sa "congested content, misplaced prerequisite learning competencies, ug cognitive demand imbalance".

Si gobernador Gwendolyn Garcia dugay na nga mipadayag nga angay ibalik ang GMRC sa curriculum sa DepEd lakip na sa English isip "medium of instruction" sa mga skwelahan.

Kini human nabantayan sa gobernador nga adunay hagit sa values ug manners o pamatasan sa mga kabatan-unan  karon.

Naalarma sab ang gobernador sa matod pa "incompetency" sa mga tinun-an sa pagsulti og English. — MEL (BANATNEWS)