Liboan ka magtutuo niapil sa eucharistic healing

CEBU, Philippines — Liboan ka magtutuo sa Archdiocese of Cebu ang niapil sa tunga sa adlaw nga “Abide in Me: A Retreat and Eucharistic Healing Service” nga gipangulohan nila ni Spanish Priest Father Pablo Escriva de Romani ug Sister Briege McKenna, OSC, kagahapon sa hapon diha sa International Eucharistic Congress, Pope John Paul, dakbayan sa Sugbo.

Gisugdan kini sa usa ka praise and worship song sa wala pa ang pagpaambit ni Mckenna sa iyang retreat.

Gipaambit ni Mckenna ang iyang personal nga encounter sa Ginoo ilabi na pinaagi sa Santos nga Misa.

Gidasig usab ni Mckenna ang mga magtutuo nga moduol sa Ginoo tungod kay andam kini sa kanunay maminaw sa tanan nga ipaambit nilang mga kalisdanan, kalipay ug kasakit.

Human sa pagpaambit ni McKenna gisunod dayon ang Santos nga Misa ni Romani diin gipadayag niini nga bisan og naghimo og maayo apan nagpakabuta bungol sa pagpangayo og panabang sa imong isig ka tawo sala gihapon kini.

Si Romani niawhag sa mga magtutuo nga dili magduha-duha sa pagduol sa Ginoo uban sa pangama sa Birhen Maria tungod kay anaa kini sa kanunay nga nagpaminaw ug motabang.

Ang pangulo sa Commission on Laity Fe Mantuhac-Barino mapasalamaton sa 5,000 ka magtutuo nga niapil sa maong kalihokan.

Dugang ni Barino nga siya malaumon nga adunay gayud milagro sa maong kalihokan.

Ang mga nanambong mapasalamaton usab tungod sa daghan pagtulon-an nga ilang napupo uban sa healing. — /BDB (BANAT NEWS)