Kwatro anyos nga bata nauli na human gitaho nga gidagit

CEBU, Philippines — Nahibalik na sa apohan ang 4 anyos nga bata nga unang gi-report sa pamilya nga gikuha sa usa ka lalake diha sa Block 27, Barangay Mabolo, siyudad sa Sugbo pasado alas 10 sa buntag sa adlaw’ng Martes, Oktubre 24.

Sa report sa Mabolo Police Station 4 pinangulohan ni Major Eraño Regidor ang apohan sa bata nga si Salvacion Buyno, 82 anyos, residente sa Block 27, Barangay Mabolo midangop sa police station ug miingon nga ang iyang apo giingong gikuha sa usa ka tawo.

Matud pa sa mga silingan nga nakit-an nila ang lalake uban ang menor de edad nga nisakay og Cerese bus paingon sa amihanang bahin sa Sugbo.

Human madawat ang report nagpahigayon dayon sila og imbestigasyon, niadto sa Cerese Bus Terminal nga nahimutang sa usa ka mall sa Barangay Mabolo ug gi-interview ang dispatcher ug mihangyo nga i-review ang kuha sa CCTV.

Apan wala dayon sila makatan-aw sa CCTV ug gi-schedule sunod adlaw.

Alas 11 sa gabii sa samang petsa subling nihimo og follow-up investigation ang kapolisan ngadto sa balay sa apohan ug ilaha kining na-istorya ug miingon nga ang bata nabalik na sa ilaha.

Gibutyag sa apohan nga alas 7 sa gabii kagahapon giuli sa balay ang bata human kini gi-turnover sa GAD Focial sa Barangay Ermita.

Gipahibawo siya nga usa ka batang lalake ang gitugyan sa barangay hinungdan nga dali kining miadto ug didto nakit-an niya ang bata ug matod pa sa iyang apo gidala siya sa wala niya nailhan nga tawo ug gibiyaan sa usa ka mall diha sa dalan Leon Kilat.

Suma ni Major Regidor nangita pa sila og laing anggulo sa CCTV camera aron maklaro ang dagway sa lalake nga nagkuha sa bata. —/MEL (BANAT NEWS)