Mga JO sa kagamhanan sa dakbayan hatagan usab og bonus

CEBU, Philippines —  Human sa pahibawo nga makadawat og P35 mil nga bonus ang mga regular ug casual nga kawani sa Cebu City Hall, gitinguha karon ni Mayor Michael Rama nga mahatagan usab og bonus ang mga Job Order (JO) employees.

Hinoon suma pa sa mayor nga dili kinahanglan nga susama og kantidad sa madawat sa mga regular ug casual nga kawani ang ilang madawat.

"The Vice Mayor (Garcia) was stressing na dugay nasad nakong ganahang tagaan ang Job Order, but dili necessarily na P35,000," segun ni Rama.

Sumala pa ni Rama, dili siya modiktar aron dili sila ma pressure atol sa ilaha unyang pagtuki niini sa konseho.

Kinahanglan ang maong tinguha nga paghatag ug pahalipay sa mga Job Order Employee moagi gayud kini sa konseho ug maoy iyang tinguha nga madawat usab kini sa wala pa ang pasko.

Si Vice Mayor Raymond Alvin Garcia mitug-an nga ang bonus nga ihatag sa mga kawani maggikan sa 'General Fund' sa city government nga naka-andam na ang gahin niini nga naapil sa tuig 2023 budget.  MEL  (BANATNEWS)