Kawasan Falls ug canyoneering activities ibalik
CEBU, Philippines — Ablihan na og balik sa Probinsiya sa Sugbo ang inila nga Kawasan Falls sa Lungsod sa Badian karong Oktubre 26, 2023.
Ang Provincial tourism officer Marti Ybañez nikompirma niini human sa tigom nila ni Gobernador Gwendolyn Garcia.
Matud ni Ybañez nga tugotan na usab nga maka-operate og balik ang canyoneering activities sa Lungsod sa Ginatilan ug Malabuyoc.
Sayo pa, gisuspenso sa gobernador ang kalihokan sa turismo sa Kawasan apil ang canyoneering human nasayran nga adunay portions sa trail nga delikado pa human sa panguso-kuso sa bagyong Odette ug uban pang concerns.
Nahisgotan sa tigom ang paglatid sa general guidelines alang sa tanang canyoneering activities ug ingon man ang tourism zone area sa Kawasan Falls.
Matud ni Ybañez nga ang Kapitolyo mo apod-apod sa 900 ka tour guides ug operators sa ilang tagsa-tagsa ka accident insurance coverage nga ang premium gibayran sa Kapitolyo.
Si Ybañez nagkanayon nga ang maong mga operator nigradwar na usab og trainings nga gimando sa Kapitolyo aron pagsiguro nga professional ug maayo ang pagserbisyo ngadto sa mga turista.
Ang maong mga operator gipaubos usab sa training sa Department of Tourism aron mas mo nindot ug molambo pa ilang pagtrabaho. BDB (BANATNEWS)
- Latest
