Tourist van nasampak sa taytayan, tulo ka bakasyonista nakalas
CEBU, Philippines — Nahimong trahedya ang bakasyon sa mga turista gikan sa Davao del Sur human ang gisakyan nila nga van mibangga sa Camanayon Bridge, Barangay Buenos Aires, Lungsod sa Carmen sa Probinsiya sa Bohol diin tulo ka kinabuhi ang nakalas sa hitabo. Giila ang mga nakalas sa insidente nga sila si Abelardo Cagampang, Marlon Dosdos ug Janice Borbon samtang ang mga naangol mao sila si Lucino Cagampang Jr., Jasper Argones ug ang driver sa van nga si Junre Cagampang, ang unom pulos ang pulos gikan sa Davao del Sur ug naa sa Bohol kay nagbakasyon.
Sigon pa ni Police Corporal Joey Baquiano, Assistant Investigator sa Carmen Municipal Police Station sa Bohol Police Provincial Office (BPPO) nga sila si Aberlardo, Marlon ug Janice gidala sa pinakaduol nga tambalanan apan patay na kining nadangat sa ospital.
Sila si Lucino, Jasper ug Junre pulos naangol gumikan sa kakusog sa pagbangga sa van sa taytayan.
Sa imbestigasyon sa kapulisan ang van nga gisakyan sa unom ka mga pasahero nibiya sa Panglao Island Lunes sa kaadlawon paingon unta sa Chocolate Hills. Apan impormasyon nga gibutyag sa kapulisan ang driver nga si Junre giingong nakatulog samtang nagmaneho hinungdan nga mibangga ang van taytayan.
Posibleng mag-atubang og kasong reckless driving resulting in multiple homicide ug injuries ang driver sa van. (BANAT NEWS)
- Latest
