Website sa House, na-hack

CEBU, Philippines — Wala nay gipili ang mga hackers karon, ning bag-o, ang official website sa House of Representatives ang matud pa ilang gi-hack human sa paglabay dul-an usa ka semana sa dihang duha ka mga ahensiya sab sa gobiyerno ang ilang na-hack.

Matud pa sa report sa Philstar.com, si House Secretary General Reginald Velasco sa pamahayag niini nga gipagawas nagkanayon nga ang House of Representantives website nakasinati og “unauthorized access”sayo kagahapon sa buntag adlaw nga Domingo.

Giawhag niini ang publiko nga magmatngon ug dili magkompiyansa kung dunay mga kadudahang madawat nga mga emails o mga komunikasyon nga magpailang gikan sa House of Representatives.

Ang maong website sa Ubos Balay Balauranan gibutang ang mga nagkalain laing mga impormasyon bahin sa mga balaod ug balaudnon nga gituki, mga impormasyon sa tagsa-tagsa ka mga magbabalaod sa nasud ug daghan pang uban.

Niadtong Domingo, nakurat nalang ang House sa dihang pagabli sa ilang website giilsan na kini og "trollface."  Ang matud pa hacker nagpaila nga “3MUSKETEERZ.”

Sumala pa nga dunay mga parte sa website nga sagad adto ibutang ang mga links sa press releases o recordings sa House panel meetings nga gipang-ilisan og lain.

Tungod niini, daling gisirad-an ang website sa House.

Matud pang Velasco nidangop na sila sa Department of Information and Communications Technology (DICT), Cybercrime Investigation and Coordinating Center (CICC) ug uban pang  law enforcement agencies aron paghimo og imbestigasyon bahin niini.

“While we work to restore the website fully, we ask for patience and understanding,” matud pang Velasco. “We are committed to ensuring the security and integrity of our digital platforms, and we will implement additional measures to prevent such incidents in the future,” dugang pa niya.

Sa miaging semana, ang PhilHealth ug ang Philippine Statistics Authority (PSA) mibutyag nga nakasinati sila og cyberattacks. Ang PhilHealth miangkon nga dunay mga data nga naglakip sa mga personal nga impormasyon sa ilang mga miyembro ang nakuha sa hackers.

Samtang ang PSA miingon nga human sa ilang pagsusi nasuta nga ang nasulod sa hackers mao lang ang ilang Community-Based Monitoring System. — /IBM (BANAT NEWS)