Magtutudlo ug non-teaching staff hatagan og incentives
CEBU, Philippines — Makadawat og P2,000 nga cash incentive ang 3,000 ka mga magtutudlo ug mga non-teaching personnel sa Department of Education (DepEd) sa Lapu-Lapu City School Division karong adlawa Oktubre 5, 2023 nga maoy adlaw sa pagsaulog sa World Teachers Day.
Kini human aprobahi sa mga sakop sa konseho sa siyudad sa Lapu-Lapu ang ordinansa nga naghatag og pagtugot sa maong kantidad nga ihatag isip pagpahalipay sa mga magtutudlo.
Una niini nagpahigayon og special session ang mga sakop sa konseho sa dakbayan sa Lapu-Lapu niadtong Martes Oktobre 3, 2023 aron sa pagtuki sa maong ordinansahon nga gigama ni Konsehal Annabeth Cuizon.
Mapasalamaton si Konsehal Cuizon nga giaprobahan sa mga konsehal ang mao niyang ordinansa.
Gawas sa mga teaching personnel gikan sa publikong tunghaan, ang mga magtutudlo sa Lapu-Lapu City College ang makadawat usab og susamang kantidad sa cash incentive.
Una niini ang DepEd mipahibawo nga mohatag usab sila og P1,000 nga cash incentive ngadto sa mga magtutudlo lukop nasud aron paghatag og pasidungog niini atol sa kasaulogan sa World Teachers Day. (BANAT NEWS)
- Latest
