WTE plant hayan matukod tulo ka tuig gikan karon

CEBU, Philippines — Human ma-settle ang pagpangita og location site, ang Waste to Energy (WTE) plant nga giingong solusyon sa mga problema sa basura ug sa supply sa enerhiya sa dakbayan sa Sugbo matuman na sa tulo ka tuig.

Si Konsehal Joel Garganera, Chairman sa Committee of Environment, niingon nga mao kini ang timeline nga ilang gibana-bana samtang padayon pa ang pag proseso sa saktong mga permit aron masugdan ang pagtukod niini.

Nunot sa isyu sa ownership status sa Inayawan Landfill nga mao unta ang orihinal nga mahimutangan sa maong planta, si Garganera niingon nga ang kagamhanan nakakita na og laing dapit sa bukirang barangay sa dakbayan.

Hinuon nagdumili si Garganera sa pagbutyag niining nahisgutang lugar samtang padayon pa ang mga proseso sa gikinahanglang permit.

“Lisod na kaayo kay we go to the court and all those legal process, maabtan tag syam2x,” matud ni Garganera sa issue pagpanag-iya sa Inayawan Landfill.

Nitumaw niadtong 2019 nga ang Inayawan Landfill dili iya sa kagamhanan sa dakbayan kun dili sa usa ka residente ubos sa ngalan ni Renato Senining.

Matud ni Garganera, ang proponent sa WTE project, New Sky (China) Environment and Techo Co Ltd. nakakaplag ug pito ka ektarya nga property diin ang presensya sa tubig gikonsiderar usab.

Aron mahimo kini, ang kontraktor kinahanglan nga magkalot og labing menos 60 metros aron dili mabalda ang suplay sa tubig sa siyudad.

"We are in the final stage na with regards to the procurement sa lot, sa accessibility, so let's just leave it there kay ongoing pa man," matud ni Garganera.

Ubos sa WTE, ang tanang basura gikan sa dakbayan sa Sugbo ihatod niini nga planta ug i-recycle ngadto sa renewable energy supply nga dili mominus 18,000 megawatts nga maka-cater sa 34,000 ngadto sa 40,000 ka mga panimalay.

“Kay kita man gud diri sa Cebu City wala tay dako na plain na kabutangan nato, so kini sya this could solve the (garbage problem) not just in the city but to the neighboring areas,” matud ni Garganera.

Dugang pa niya, kini nga proyekto walay 'gasto' sa bahin sa siyudad tungod kay ang tanang pondo abagahon sa proponent.

“We are looking at around 3 years, from permits and everything, and the actual operation,” matud ni Garganera. — /MEL (BANT NEWS)