Viscom mibahad sa ubang NGOs nga front sa CPP-NPA

CEBU, Philippines —  Mibahad ang Visayas Command sa mga kaalyado ug kakunsabo sa CPP-NPA nga dili sila makatago pinaagi sa cause-oriented groups ug advocacy support groups.

Dili sab magpanuko ang gobiyerno sa pagpakgang sa matod pa ilang pagpangilad, kurapsyon, ug terorismo.

Ang maong bahad may koneksyon sa kasong gisang-at ni Brigadier General Joey Edcanillas, Commander sa 302nd Infantry Brigade batok sa Community Empowerment Resource Network (CERNET) nga naa na karon sa preliminary investigation.

“Justice will be served for all the menace they’ve caused to the Filipino people. They better have a good lawyer, or better yet, the lawyers of their allied organizations be prepared to answer the call for justice of the people," matud ni Lieutenant General Benedict Arevalo, Commander sa Visayas Command human sa meeting niini kang Escanillas.

Kahinumdoman nga 27 ka mga tawo nga konektado sa CERNET ang gipasakaan og kasong kalapasan sa Republic Act 10168 kun Terrorism Financing Prevention and Suppression Act of 2012.

Gibutyag sa Viscom nga ang CERNET gigamit matod pa sa CPP-NPA isip front alang sa fund generation scheme sukad sa tuig 2001 aron suportahan ang ilang logistical ug financial requirements.

Ang pundo nga natigom sa CERNET gikan sa nagkalain-laing international organizations gipaagi sa pagtabang matod pa sa marginalized sector ang gibalhin sa CPP-NPA aron pagsuporta sa ilang terror activities.

Gihimakak kining tanan sa CERNET atol sa press conference human gipasaka ang kaso.

Mipahimangno sab si Lt. General Arevalo da publiko nga sila manubag kun motabang sa mga rebelde.  “Aiding, conspiring, and providing financial support to the terrorist group is a crime punishable under our law. For those who are doing this, we urge you to stop. We are determined to end the local communist armed conflict in this part of the country and will not hesitate to enforce the full extent of the law to bring justice for our people who have been the victims of these nefarious acts," asoy ni Arevalo. (BANAT NEWS)