PB niawhag sa airline companies sa pagpalambo sa serbisyo

CEBU, Philippines — Giawhag sa hunta probinsiyal ang airline companies nga mas palambuon pa ang serbisyo niini nunot sa mga reklamo sa pasahero nga mga nalangay o nakanselar ang flights lakip ang overbookings ug uban pa.

Ang hunta probinsiya nipalabang og resolusyon atol sa ilang regular session kagahapon alang niini diin ang mga bokal nagkanayon nga sulod sa pipila na katuig nahimong “in demand” ang air transport tungod kay gawas nga adunay airlines nga nitanyag og mas barato nga presyo sa ticket, mas paspas usab ang biyahe.

Ug gumikan sa pagdako sa demand gipaabot nga ang airline industry mohimo og mas maayo nga serbisyo pag-accommodate og mas daghang pasahero.

Apan matud sa hunta probinsiyal adunay “alarming reports” nga mga reklamo sa mga pasahero kalabot sa “poor customer services” sa mga “low-cost carriers” o eroplano sama sa kanselasyon o pagkalangay sa ilang flights, overbookings ug uban pa.

“These reports have become common, frequent and recurrent that citizens are no longer surprised. In fact, flight schedules without glitches or irregularities are a rarity and are somehow considered extraordinary”, tipik sa resolusyon nga gipangamahan ni Bokal Glenn Anthony Soco sa ika-unom nga distrito.

Nihatag og example ang bokal kalabot sa usa ka lokal airline company nga giingong dili mo menos sa 3,000 ang reklamo nga nadawat diin base sa Senate Committee on Tourism nga ang pasahero maoy nag-antos sa dili maayong serbisyo..

“Passengers with delayed or even cancelled flights were merely given a biscuit and a bottle of water. Some had to sleep in airports, waiting for developments of their flights”, matud ni Soco.

Si Soco nagkanayon nga tataw kini nga “mishandling” ngadto sa mga customer taliwala sa kasamtangang balaod nga Air Passenger Bill of Rights of 2012.

Matud usab sa hunta probinsiyal nga angayang palambouon sa airline companies ang ilang serbisyo aron malikayan nga makadawat og reklamo. (BANAT NEWS)