Cherry Blossom Park makita na sa Mandaue

CEBU, Philippines —  Magbaton na og iyang kaugalingong Cherry Blossom Park ang siyudad sa Mandaue nunot sa gihimong pagtanom og 1,000 ka punoan ug seedlings sa Palawan Cherry Blossoms o Balayong sa Eco Learning Park sa Barangay Umapad.

Gipahigayon ang pagtanom niadtong Sabado sa buntag Septiyembre 16, 2023 sa mga sakop sa Department of General Services Office uban si First Lady Sarah Walker Cortes kinsa maoy nangulo sa beautification program sa Mandaue City uban usab ni Mandaue City mayor Jonas Cortes.  Gihimo ang pagtanum sa mga Balayong sa Kalidhay Park kanhi Umapad dumpsite aron pagpanindot sa lugar nga nagpadayag sa kausaban ug kalambu-an.

Ang palawan cherry blossom o sa lokal gitawag og balayong nagbaton lamang og kasarangan nga gidak-on nga matang sa kahoy nga mamuwak usab kini og bulok puti, light pink nga daw susama usab sa Japan iconic Sakura.

Ang pangulo sa DGS nga si Engineer Marivic Cabigas, miingon nga giplano ang pag-ugmad sa maong luna sa Barangay Umapad tungod kay sulod sa dugay nga panahon kini gihimo lamang nga labayanan sa mga basura.

Gilauman nga ang kanhi Umapad mahimo na unya nga usa ka tourist attraction nunot sa gihimo nga mga bag-ong kaugmaran sa lugar.

Si Engineer Cabigas miingon nga dugang nilang giplano gawas sa pagpananom og mga seedlings sa balayong gitinguha usab sa kagamhanan ang pagtukod og nagkadaiyang estraktura sa dapit.

Naglakip sa pagaugmaron mao ang amphitheater nga ipahimutang sa atubangan sa palawan cherry blossoms nga mag-atubang sa Mactan Channel.

Butangan usab kini og mga comfort rooms, playground alang sa kabataan ug lugar alang sa mga senior citizens ingon man exercise area, ug uban pa.

Lakip na usab niini ang ‘Cherry Blossoms Pocket Forest’ nga natigayon pinaagi sa mga pagpaningkamot nga gihimo sa unang ginang sa dakbayan, Sara Walker-Cortes. (BANAT NEWS)