Mga polis ipakatap sa venue sa Bar exams

CEBU, Philippines — Karong Septiyembre 17, 20 ug 24 ipahigayon ang ikatulong Regionalized Bar Examination diin dinhi sa Sugbo mahitabo kini sa duha ka mga unibersidad sama sa University of San Carlos School of Law and Governance diha sa dalan Pelaez ug University of San Jose - Recoletos Basak Campus.

Nunot niini si Police Lt. Col. Janette Rafter, Deputy City Director for Operations ug tigpamaba sa Cebu City Police Office nga dul-an sa 200 ka mga police ang ilang giandam aron ipakatap sa duha ka tunghaan.

Matud ni Rafter ang USJR Basak Campus maoy butangan og mas daghang polis kay dako kini nga tunghaan. Giklaro sa CCPO nga nakig-alayon sila sa ubang ahensiya sama sa Cebu City Transportation Office, Cebu City Disaster  Risk Reduction and Management Office ug sa mga barangay sanglit matag eskwelahan magmontar sila og advance command post.

"Every time diri sa Cebu City under sa atoang LGU kang Mayor Michael Rama naa tay template ginabuhat nga when it comes sa mga dagko nga event automatic na dayon na kanang atoang CCTO especially ni sila for the traffic and then CCDRRMO in case emergency responses, sa PNP together with AFP and EOD pud sa PCG," sigon ni Rafter.  Nasayran moabot sa 1,100 ang mo take og exam sa University of San Jose - Recoletos samtang University of San Carlos 540 ang examinees.

Giklaro sa kapulisan nga sa gawas ra sila magbantay sugod alas 2 sa kaadlawon ipakatap na sila aron masiguro nga hapsay ug malinawon nga mapahigayon ang Bar Examination.

Gumikan kay dunay dalan nga sirad-an ilabi na diha sa USC mangayo og pagsabot ang kapulisan sa publiko ug mihangyo kun mahimo dili nalang una moagi sa maong dapit sa mga adlaw nga mahitabo ang Bar Examination aron dili matanggong sa kahuot sa dagan sa trapiko. —/IBM (BANAT NEWS)