Bag-ong hepe sa Talisay nilingkod na kagahapon
CEBU, Philippines — Ipadayon ang pakig-alayon sa publiko aron mamentinar ang kahapsay ug kalinaw sa Dakbayan sa Talisay kini ang direktiba nga gihatag sa Mayor Gerald Anthony Samsam Gullas. Jr. ug sa direktor sa Police Regional Office (PRO)-7 Brigadier General Anthony Aberin sa bag-ong hepe sa Talisay City Police Station Police Lieutenant Colonel Wayne Magbanua.
Kagahapon sa buntag gipahigayon ang assumption of office ceremony diha sa Talisay City College diin pormal na nga nilingkod isip hepe sa kapolisan sa siyudad si Magbanua hulip kang Police Lieutenant Colonel Randy Caballes kinsa madestino na karon diha sa Cebu Police Provincial Office (CPPO).
Sa iyang mensahe, si Gullas nagkanayon nga dili angayang magpanuko sa pagduol ang bag-ong hepe sa nagkadaiyang sektor sa siyudad diin silang tanan motabang sa kahapsay ug kalinaw sa lugar.
Si Magbanua nipasalig nga buhaton niya kutob sa iyang mahimo nga maserbisyohan ang katawhan sa Dakbayan sa Talisay.
Si Police Lieutenant Colonel Gerard Ace Pelare, tigpamaba ni PRO-7 nagkanayon nga mando sa direktor nga himuong Able, Active ug Allied ang pwersa sa dakbayan.
“Importante kaayo diri sa Talisay nga allied gyud ang atoang katawhan sa kapol kay og makita ninyo usa sa strength dinhi sa police force sa Talisay they are in partnership with the community gusto sa atong regional director nga ipadayon kining maong matang sa panerbisyo kinahanglan ang polis ug komunidad magkuyog”, matud ni Pelare.
Nasayran nga si Magbanua nahimong deputy city director for operations sa Dakbayan sa Lapu-Lapu. BDB (BANATNEWS)
- Latest
