Upat angol sa buybust

CEBU, Philippines — Upat ang angol sa buy-bust operation sa Drug Enforcement Unit sa Balamban Police Station human nakigpinusilay ang subject sa operasyon sa Barangay Pondol, Lungsod sa Balamban, Sabado sa gabii.

Matud sa hepe sa Balamban Police Station Police Lt. Col. Glenn Hife nga ang subject sa buy-bust operation mao si Richard Moscoso alyas Harry, ang transaksiyon nahitabo sa Barangay Pondol.

Apan nakabantay nga polis ang gika-transaksiyon daling misakay sa color gray nga Mitsubishi Mirage G4 nga dunay plaka nga Y2D754 si Moscoso ug misibat ug didto nahitabo ang ginukdanay nga naabot sa Barangay Cambuhawi.

Nasayran gawas kang Moscoso sakay sab sa maong sakyanan sila si Arianne Blaire Navales nga maoy driver, Rex Ledesma, Rhea Abegail Genovesa ug duha ka 15 anyos nga mga bata.

Pag-abot matud pa sa Barangay Cambuhawi ang sakyanan nababagan sa patrolcar sa Balamban Police Station ug na-corner apan bisan pa ug giawhag sila nga mo-surrender gi-atras ni Arianne ang awto hinungdan nadasmagan ang motorsiklo sa usa sa mga operatiba ug nalagpot sa kanal.

Ang sakyanan nalahos ngadto sa kasagingan, gikatahong si Moscoso sab maoy unang mipabuto sa kapulisan apan na-neutralize kini ug nadakpan.

Sa pagsusi sa kapulisan sa sakyanan, nasuta nga samdam na ang mga sakay nga sila si Rex Ledesma, Arianne Blaire Navales, ug ang usa ka 15-anyos nga bata nga daling gidala sa Balamban Provincial Hospital.

“Wala mi kahibalo og grupo ba ni sila pero mag live-in partner ni sila kaning si Arianne ug si Richard, ug si Rex ug si Abigail maoy live-in partner pud,” sigon ni  Hife.

Nakuha sa kapulisan ang nagkalain-laing kalibre sa armas ingon mga pakete sa gituohang shabu.

Gitug-an ni Hife nga si Moscoso nadakpan na niadtong 2015 ug dugay na sab nilang kining gi-surveillance — /IBM (BANAT NEWS)