Mandaue nilusad sa cashless transaction sa merkado publiko

CEBU, Philippines — Hiniusang gilusad  sa kagamhanan  sa Siyudad sa Mandaue, Banko Sentral ng Pilipinas ug  Department of Interior and Local  Government (DILG)-7 ang cashless transaction sa mga vendor sa merkado publiko sa Siyudad sa Mandaue nunot sa Palengke-QR PH pluz nga pinasikad sa gipatuman nga ordinansa sa kagamhanan sa siyudad.

Si Mayor Jonas  Cortes sa kagamhanan sa Siyudad sa Mandaue  maoy  nangulo sa maong paglusad nga giubanan usab sa represengtante sa BSP ug DILG Director Leocadio Trovela  nga giapilan usab sa paggtambong  sa mga nagkadaiyang financial institution sa dakbayan. Sa iyang pamahayag, si Trovela  nagkanayon nga ang kagamhanan  sa Siyudad sa Mandaue nahimutang sa ika-11  nga lokal nga kagamanan nga nisagop sa Palengke-QR Ph pluz lukop  nasud, ikatulo kini sa Central  Visayas ug ikaduha sa tibulok Lalawigan sa Sugbo.

Gipasabot niya ang kamahinungdanon sa pagpatuman sa cashless transaction alang  sa mga manindahay  sa merkado publiko  sa siyudad nga ang ilang mga pumapalit dili na kinahanglan nga magdala og kwarta diin cellphone na ang gamiton sa pag-scan sa QR code sa ilang pagbayad.

Sa iyang bahin, si Cortes nagkanayon nga ilang gihangop ang pagpatuman sa Palengke-QR Ph pluz  alang sa mga vendor sa merkado publiko tungod kay tinguha usab nila ang pagsagop  sa modernong pamaagi.

Matud ni Cortes nga daghan na sa mga naninda karon sa merkado publiko sa siyudad ang nisagop  na sa maong pamaagi ug nagsugod na usab sa pagsagop  ang mga transportasyon sa dakbayan nga naglakip sa mga tricycle nga ang pletehan pinaagi usab sa cashless transaction. BDB (BANATNEWS)