Ordinansa sa Lapu-Lapu gihingusgan sa pag-implementar

CEBU, Philippines — Gipahimangnoan  sa kapolisan sa Lapu-Lapu City Police  Office (LLCPO)  ang mga Oponganon kalabot  sa nagpadayon nilang  gihingusgan nga pagpatuman sa mga lokal  nga ordinansa  nga gitumong alang  sa kahapsay ug luwas nga katilingban.

Si Police Colonel Elmer Lim, direktor  sa kapolisan sa LLCPO nagkanayon nga naglakip sa mga ordinansa nga ilang gihingusgan sa pagpatuman mao ang pagdili sa pagpanigarilyo  sa publikong lugar sama sa plaza, merkado publiko ug uban pa diin daghan ang magtapok nga mga tawo nga makahanggap sa aso sa sigarilyo nga gipabulhot sa nanigarilyo.

Matud ni Lim nga higpit usab nga gipatuman ang lokal  nga ordinansa  sa siyudad nga nagdili  sa pag-inom og ilimnong  makahubog nga dayag  ang ilang panag-inom diha sa publiko sama sa plaza o mga daplin sa karsada.

Gihingusgan usab nila  sa  kapolisan sa LLCPO ang pagdili  sa paggawas  sa panimalay  nga hubo ang ibabaw nga bahin  sa lawas babaye o lalaki sa paghatag og maayong imahen sa mga molupyo isip tourist destination dinhi sa Lalawigan sa Sugbo.

Gitataw  ni Lim ngadto sa Oponganon nga mga ginikanan nga mahinungdanon ang pahatag  og giya ngadto  sa mga menor pa nilang mga anak nga mga babaye alang sa paglikay nga mahimo kining biktima sa human trafficking.  (BANAT NEWS)