Clamping operation sa sirao gireklamo

CEBU, Philippines — Ipatawag ni Cebu City Mayor Michael Rama ang mga hingtungdan bahin sa nikatap nga video nga nag-viral sab sa social media kabahin sa clamping operation nga gihimo sa mga sakop sa Cebu City Transportation Office  sa mga sakyanan sa mga bisita sa tourist spots sa kabukiran partikular sa Barangay Sirao.

Apil sa ipatawag sa mayor sila CCTO Chief Raquel Arce, mga sakop niyang nakuha sa video nga maoy ni-clamp sa mga sakyanan sa mga bisita, Konsehal Jerry Guardo, ug pipila ka mga nanag-iya ug establisamento sa maong dapit lakip ang uban mga opisyal sa siyudad.

Matud pa sa mayor, gusto niyang masayran ang kinatibuk-an nga estorya sa maong panghitabo tungod kay sayon ra man kaayo ang magpa viral diha sa social media.

Sumala pa ni Rama, gusto niya masayran kung ang mga nag negosyo sa maong dapit aduna ba gayud parkinganan, namayad ba gayud og buhis ngadto sa siyudad.

Gitug-an sa mayor nga kung nakasala gayud ang mga ginsakopan sa CCTO, patas gayud siya masilotan sila base sa balaod. Apan kung adunay sala usab ang mga magpapatigayon sa kabukiran mag-atubang usab sila sa balaod nga ilang nalapas.

Gipadayag sa mayor nga walay luna sa iyang buhatan ang pangurakot, hinungdan gusto gayud niya masayran ang kinatibuk-an nga panghitabo may kalabutan sa maong insidente sa bukid.

Makita sa video ang mga traffic enforcers naa sa ilang sakyanan nga gilibutan sa mga tawo nga nagbagulbol tungod gipang clamp ang ilang mga sakyanan bisan naa na kini sa kilid ug wala sa karsada ug wala nakasamok sa dagan sa trapiko. (BANAT NEWS)