Usa ka libong polis pabantayon sa Pasigarbo  

CEBU, Philippines —  Dul-an sa usa ka libo ka mga polis ang ipakatap sa umaabot nga Pasigarbo sa Sugbo 2023 nga mahitabo karong Agosto 27, 2023 sa Dakbayan sa Carcar.

Sigon ni Police Lieutenant Colonel Mark Gifter Sucalit, Hepe sa Carcar City Police Station nga kapin sa 800 ka mga police ang ilang giandam alang sa maong kalihukan diin apil na niini ang augmentation gikan sa laing unit sama Regional Mobile Force Battalion.

Matud ni Sucalit nga sa kapin 800 ka mga police nga ipakatap dul-an sa 300 niini ang magbantay sa mga contingents sa Pasigarbo sa Sugbo.

Si Sucalit miingon nga kada contingent ubanan sila og lima ka police nga gikan sa ilang LGU nga nga morepresentar sa Pasigarbo sa Sugbo.

“Kung Consolacion, naay contingent Consolacion so naay lima nga gikan sa Consolacion Police Station mouban sa mga contingents,” matud ni Sucalit.

Dunay say magbantay nga mga police ug bisitahan og mobile patrol ang mga billeting areas sa mga contigents diin dili lang sa dakbayan sa Carcar ang billeting areas nila, naa sa Lungsod sa Sibonga ug San Fernando.

Nasayran sab nga naay mga police nga ipakatap aron mobantay sa dagan sa trapiko sa siyudad ilabi na sa mga rerouting nga ipatuman diin magbutang sila og mga signage ug kada eskina duha ka police magbantay.

Hatagan sab og igong seguridad ang dapit kun asa ipahigayon ang ritual showdown sa Pasigarbo sa Sugbo 2023.

“Yung Pasigarbo proper, ang rota, kung asa magtambay ang mga props, asa magtambay ang mga dancers then asa mag street dancing ug asa mo-exit apil pud na kay crucial kaayo asa mo exit ug mismo ang ritual showdown naa tay nakalatag, mao ni mga areas o component nga atong gi-secure karong umaabot August 27,” asoy pang Sucalit.

Gumikan kay tulo ka adlaw sa dili pa ang Pasigarbo sa Sugbo mag-abot-abot na ang mga contingents sa nagkalain-laing LGUs sa Probinsiya bantayan sa kapulisan pagpraktis sa mga contingents sa lugar.

Gihimug-atan sab ni Sucalit magpabilin ang ilahang naandam nga deployment sa dakbayan sa Carcar aron masiguro nga wala’y mga badlungon sa katilingban nga mapahimulos sa kahigayunan.(BANAT NEWS)