Nidagit sa bata kasohan

CEBU, Philippines — Pasakaan og kasong kidnapping ug serious illegal detention ang 32-anyos nga lalaking suspek sa pagdagit sa anak sa ilang silingan nga usa ka 8-anyos nga Filipina-Korean nga nagpuyo sa Barangay Bakilid, Mandaue City.

Ang suspek mao si Godie Flor Rama, lumad nga taga Bukidnon apan nagpuyo sa maong barangay dili layo sa gipuy-an sa pamilya sa biktima.

Si Rama nadakpan sa hiniusa nga operation sa kapulisan pinangulohan sa City Director Police Colonel Jeffrey Caballes, sa Mandaue City Police Office, Subangdako Police Station Chief Police major Romeo Caacoy, ug Police Colonel Gervacio Balmaceda Jr. RID PRO-7.

Ang suspetsado nadakpan pipila ka oras human gitaho sa ginikanan sa bata nga na-missing kini pasado alas-12 udto. Ang ginikanan sa bata nidangop sa kapolisan pasado alas-5 na sa hapon apan wala kini giisip nga kidnapping kondili missing lang.

Apan bisan wala pa nila ma-report sa kapolisan ang hitabo, ang mga kabanay sa bata walay puas sa pagpanawagan sa katawhan pinaagi sa social media bahin sa nahitabo, apil niini ang pag-post sa hulagway sa suspek.

Si Caballes miingon nga gisusi nila tanang CCTV cameras sa palibot hangtud nasundan nila ang gikahimutangan sa suspek nga dili ra usab layo sa apartment nga gipuy-an sa bata.

Sumala pang Caballes natultolan ang boarding house sa suspek ug didto nila naabtan ang bata.

Ang bata giingong gibaatan ang baba,  mga kamot ug tiil niini gamit ang packaging tape una kini gisulod sa suspek sa usa ka maleta aron dili mahalata.

Ang bata nakaangkon og mga garas-garas nga nakuha niya pagsige og lugnot.

Sumala pa ni Caballes, ang suspek mipasangil nga may kalagot ang suspek sa apohan ug inahan sa bata  kay pirme siyang pasanginlang maoy nagkuha sa ilang silhig, basurahan ug hanger.

Ang iyaan sa bata mibutyag sa media nga miangkon ang suspek nga naibog kini sa bata.

Samtang ang apohan sa bata nahibulong nganong naglagot kaniya ang suspek nga unta amigo man sila ug nakatabang man sila niini matag dunay gikinahanglan.

Gitug-an ni Caballes, nga case closed na ang maong kaso apan padayon pa gihapon pa sila sa imbestigasyon kay aduna pa man silay mga gipangtan-aw nga anggulo.

Ang bata gipaubos na sa mga stress debriefing intervention tungod sa peligro sa trauma.

Nagpasalamat ang kapulisan sa pagtinabangay sa katawhan nga niabag sa pagkaluwas sa bata.

Giklaro sab sa kapolisan nga walay labot sa maong krimen kadtong sakyanan nga nikatap sa social media nga maoy gituohang gisakyan sa mga kidnapper.

Si Police Brigadier General Anthony Aberin nalipay sa kalamposan sa iyang mga sakop ug kini misaad nga pasidunggan gyud niya ang mga polis nga nakatampo sa kalamposan sa operasyon.

“Appropriate awards and commendation will be given to the personnel involve of that operation,” matud ni Aberin.

Dako sab og tabang matod pa ang pagpakabana sa komunidad sanglit nihatag sila og impormasyon asa niadto ug asa nisulod nga apartment ang suspek.

Sa pikas bahin, si Mayor  Jonas  Cortes nahimuot sab sa resulta sa operasyon sa kapolisan ug dako ang iyang pagpasalamat kanila ug sa publiko nga nitabang.— Decemay Padilla, Romeo Limpangog (BANAT NEWS)