Cebu City maoy mo-host sa Palaro 2024

CEBU, Philippines —  Human sa 30 ka tuig, mobalik sa Sugbu ang Palarong Pambansa isip host sa maong kinadak-ang multi-sporting event para sa mga tinun-ang atleta ug kini pagahimuon sa Cebu  City.

Matud pa napili ang siyudad human nga midaog sa bidding para sa 2024 edition ang delegasyon pinangulohan ni Mayor Michael Rama  batok sa mga kaparehas sab nga LGUs nga dunay kapabilidad pag-host niini sama sa Negros Occidental ug Antique.

"On behalf of the City of Cebu, I, Mayor Michael Rama formally accept the hosting of the 2024 Palarong Pambansa, with great honor and pride.

This is a huge task and responsibility. But I assure you, that our City is ready and willing to rise to the occasion," pamulong pa ni Rama human niya personal nga gidawat ang maong tahas.

Si Rama mipadayag sa iyang dakong pagpasalamat kang Vice President Sara Duterte kinsa mao sab ang Education Secretary  ug ang kinatibuk-ang pwersa sa DepEd Palaro Board sa pagsanong sa bid sa siyudad, atol kini sa closing ceremony sa Palaro nga gihimo sa Marikina City.

            Kataposang naka-host ang siyudad sa Palaro niadto pang 1994 nga maoy ikaduha gikan sa pag-host sab niini sa unang higayon sa tuig 1954.

Si Cebu City Sports Commission chairman John Pages miingon nga ang “team effort” maoy yawe nga ang Cebu City ang nakadaog sa bidding.

Gipaabot nga dunay lapad nga himuong renovations sa Cebu City Sports Center nga magsilbing main venue sa mga events nga planong humanon sa pagtapos ning tuiga dayon.

            Pang-usbon ug paninduton sab ang mga pasilidad sa 22 ka  mga tunghaan nga magsilbing katulganan sa mga atleta matud pang Hontiveros. (BANAT NEWS)