Cebuana nakauban sa paniudto ni Pope Francis

CEBU, Philippines —  Usa ka Cebuana nga taga Mandaue City ang usa sa napulo ka mga batan-ong gipili nga makadungan og paniudto ni Pope Francis didto Lisbon, Portugal nga diin karon didto gisaulog ang World Youth Day.

Ang 33- anyos nga si Audrey Criscille Abatol nga taga Mandaue City nakauban ang siyam pa ka mga batan-ong gikan sa nagkalain-laing nasud.

Ang tulo niini mga taga Portugal, tagsa gikan sa Peru, Equatorial Guinea, United States, Palestine, Colombia ug Brazil sumala pa sa news service sa Vatican. Si Abatol lamang ang nag-inusarang Pilipino didto sa kan-anan kauban sa Santo Papa.

Matud pa, gisaw-an sa Santo Papa ug sa mga kabataan ang pasta, karne, ug ice cream  diha sa Apostolic Nunciature o sa pinuy-anan sa  apostolic nuncio sa Lisbon.

Sumala pa nga sa dihang gipaila ni Abatol ang iyang kaugalingon kang Pope Francis, unang nakita sa Santo Papa ang imahe ni Sr. Santo Niño ug nakaila dayon kini niini.

Ang imahe maoy gasa sa mga Pilipino para sa Santo Papa.

 “It was simple, I’m Audrey from the Philippines. And we also presented a gift, a small gift. So for myself, I presented a Santo Niño de Cebu, it’s the Holy Child Jesus of Cebu, my island, I’m from Cebu, so I presented this gift and a bit of small notes for the Pope.”

Matud pa nga pagkadungog sa Santo Papa sa “Sr.Sto.Niño” nakahinumdom dayon kini ug nangutana. “He asked, ‘Oh Santo Niño?’ It was a beautiful moment,” matud pang Abatol.

Atol sa pagpangaon, nangutana si Abatok sa Santo Papa “how to become a better friend and a better young fellow to others.”

“First he said that joy cannot be taught but it needs to be shown, so that’s what he suggested that really just show the Gospel through your actions, through what you do because it will be contagious,” pagkutlo pang Abatol sa gitubag kaniya sa Santo Papa.

Giangkon ni Abatol nga naglisod gyud siya pagsabot sa pinulongang Espanyol ug Italyano nga maoy lengwaheng gigamit ni Pope Francis ug sa mga kabataang imbitado sa paniudto.

Nagpasalamat hinuon sa mga kaubang delegado nga maoy mihubad sa pipila ka mga pulong sa tubag sa Santo Papa para iyang masabtan.

Dako  iyang kalipay ug giisip niyang usa ka gasa ug grasya gikan sa Kahitas-an nga kausa sa iyang kinabuhi nakasalo niya sa pagkaon ang giisip nga sumusunod sa labing unang Santo Papa nga si San Pedro ug maoy representante ni Hesu Kristo dinhi sa kalibotan.

 Sumala pa sa Archdiocese of Cebu, si Abatol usa ka volunteer sa World Youth Day 2023 sa Lisbon, isip kabahin sa international relations team sa maong kalihokan ug isip “pilgrim manager for the Philippines and Oceania episcopal conferences.”

Nakatambong na sab siya sa mga nangaging mga World Youth Day sa Rio de Janeiro sa Brazil niadtong 2013, Krakow sa Poland niadtong 2016,  ug sa Panama niadtong 2019.

Sumala pa niya, nahimo niyang inspirasyon sa kanunay pagkuyog sa selebrasyon sa World Youth Day ang kaniadto pag-host sa Pilipinas sa maong kalihokan niadtong 1995 nga gipangunahan Pope John Paul II nga karon usa na ka Santos.  (BANAT NEWS)