Mga pisot nga hamtong bayran kun magpatuli
CEBU, Philippines — Mohatag og pahalipay ang kagamhanan sa Lungsod sa Minglanilla alang sa mga hamtong nga lalaki nga pisot o wala pay tuli kun sila makabaton og kaisog nga magpatuli.
Kini ang hagit ni Mayor Rajiv Enad pinaagi sa iyang Facebook Page. Giangkon ni Enad nga kini iyang hagit iyahang gisunod sa gihimo sa Dakbayan sa Lapu-Lapu.
Matud pa niya nga dili lalim ang magpatuli ilabi na kun mga hamtong na kay lagi mauwaw naman. Nahimo nang tradisyon sa Pilipinas nga ang mga kalalakin-an kinahanglang magpatuli.
Si Enad mitanyag karon og tag P3 mil sa mga lalaking magpatuli nga nag edad og 18 anyos ngadto sa 30 anyos, P5 mil alang sa nag edad 31 ngadto sa 59- anyos ug tag P10 mil sa nag edad 60 anyos pataas.
Sa matag kategorya sa pangidaron tag lima ka tawo ang ilang hatagan og pahalipay. Karon na Agusto 5 sugdan ang libreng tinuliay sa Barangay Ward 1.
Ang magpatuli padad-on lang sa ilang birth certificate ug molahos na sa lugar diin himuon ang pagpanuli.
Kahinumdoman nga sa Lapu-Lapu City , madasigon kaayo si Mayor Junard “Ahong” Chan sa iyang kampanyang “Walay apo ni Lapulapu nga pisot.”
Tuod man, dunay mga hamtong nga nag-edad og lapas 20 anyos ang mitunga sa gipahigayong libreng pagpanuli diha sa Lapulapu City Hoops Dome.
Sa kalipay sa mayor, ang matag usa kanila gipanghatagan og P10 mil. Ug daw duna pa gyuy usa ka lolo nga duna nay 62 ka mga apon ang naengganyo nga nagpatuli, apan ning tungora, P20 mil ang gigantic kaniya sa mayor.
Ang maong apohan mikomedya pa nga human niya og tuli “impas tanan niyang utang.” IBM (BANATNEWS)
- Latest
