Construction worker gipusil diha sa lungsod sa Sibonga

CEBU, Philippines —  Naangol ang usa ka construction worker human gipusil sa duha ka suspek nga nagsakay og motorsiklo niadtong Sabado sa gabii, Hulyo 22, 2023 didto sa Barangay Poblacion, lungsod sa Sibonga, habagatang Sugbo.

Ang biktima giila nga si Romnick Cacaldo Dengal, 35 anyos, pamilyado nga taga Brgy. Matobato, Bindoy, Negros Oriental ug anaa sa lungsod sa Sibonga tungod sa gi trabaho nga road widening diin usa siya ka leadman.

Samtang ang mga suspek giila nga sila Clyde Castañarez Rivera, 33 anyos nga maoy giingong namusil, ulitawo usa ka tricycle drayber nga taga brgy. Poblacion, ingon man si Ceferino Calderon Fernandez, 47 anyos, minyu, way trabaho nga taga Brgy. Tubod, Lungsod sa Sibonga nga maoy nag drive sa motor.

Ang kapolisan sa Sibonga ubos sa pagdumala sa ilang hepe nga si Police Captain Fort Antony Valdez dali nga ni responde human makadawat og tawag kabahin sa pagpamusil sa maong lugar.

Base sa initial nga imbestigasyon ang biktima nag inom uban sa iyang mga amego sa maong dapit og kalit lang adunay nag motorsiklo nga naay backrider ang ni pusil sa biktima sa makadaghang higayon.

Ang biktima nakaangkon og samad pinusilan sa iyang tiyan ug wala nga paa ug daling gitabang sa Sibonga Municipal Disaster Risk Reduction and Management Office (MDRRMO) ug gidala kini sa tambalanan sa Dieparine Community Hospital.

Samtang ang mga suspetsado nadakpan gahapon sa ala 1:30 sa hapon Hulyo 23, 2023 pinaagi sa hot pursuit operation sa Brgy. Poblacion, Sibonga Cebu.

Sa pag-imbestigar sa mga polis giangkon sa suspek nga nag-inom ang biktima sa nahisgutang lugar ug dihang gitagayan siya og beer iya kining gibalibaran tungod kay wala siya personal nga makaila niini.

Hinungdan nga gihulog sa biktima ang baso sa beer ngadto sa tuong tiil sa suspek.

Nasuko ang suspek og nipauli kini og sa dihang mibalik nagdala na kini ug wa pa matino nga kalibre sa pistola ug namusil sa biktima sa makadaghang higayon.

Ang mga suspek anaa na sa kustodiya sa Sibonga Police Station ug nagpaabot nalang sa pagpasang-at og tukmang kaso.  UV Intern/Romeo Marantal/MEL (BANAT NEWS)