26 ka polis sa Talisay gipaubos sa training aron mahimong SWAT

CEBU, Philippines —  Niabot ngadto sa 26 ka polis sa Dakbayan sa Talisay ang gipadala na sa training center sa Police Regional Office (PRO)-7 sa Lungsod sa Sibonga alang sa pagbansay aron mahimo na nga Special Weapons and Tactics (SWAT).

Niadtong Huwebes sa buntag pormal nga gihimo ang send-off ceremony nga gitambongan sa hepe sa kapolisan sa siyudad Police Lieutenant Colonel Randy Caballes, Mayor Gerald Anthony “Samsam” Gullas, Jr. ug sa duha ka retired general. Sa maong gidaghanon sa mga polis usa niini ang 35-anyos nga babaye nga si Police Corporal Pearl Marie Yongao.

Gibutyag ni Yongao nga niboluntaryo siya nga mopaubos sa training aron  mamahimo nga sakop sa SWAT.

Matud ni Yongao nga dawaton niya ang tanang hagit sa padayon nga pagbansay aron makahatag og maayong serbisyo ngadto sa katawhan.

Si Gullas nanghinaot nga magmalampuson ang pagbansay sulod sa tulo ka buwan ug sa ilang pagbalik sa Dakbayan sa Talisay mas mo nindot ang serbisyo nga ilang mapakita.

Sayo pa, ang kagamhanan sa siyudad nigahin og P3 milyones alang sa pagpaubos sa pagbansay sa kapolisan sa siyudad.

Lakip sa nitambong sa kalihokan mao ang kanhi heneral nga nahimo usab nga direktor sa PRO-7 nga si retired police brigadier general Patrocinio Comendador, Jr. ug retired police brigadier general Lani O’ Nerez.  BDB (BANATNEWS)