Naga napiling mo host sa Cebu Conqueror 2023

CEBU, Philippines —  Ang Dakbayan sa Naga napili nga mo host sa Cebu Conqueror 2023 Car and Motorcycle Endurance Challenge nga gipahigayon kagahapon diin hangtud kini sa Hulyo 23, 2023 diha sa St. Francis og Assisi Ocean Park.

Ang endurance challenge nagsugod sa alas 12:00 sa udto diin gipahimangnoan ang mga Nagahanon hilabina kadtong nagpuyo sa mga interior lugar nga magbinantayon inig gawas nila sa mga eskina padulong sa highway ug kadtong mga mo gawas sa eskina sa north bound lane sa national highway.

Ang mga rider nga mosalmot sa maong endurance challenge anaa sa 170 diin tumong niini nga malibot ang tibuok Probinsiya sa Sugbo sulod sa 24 oras.

Sa laing bahin, adunay ipahigayon usab nga car and motor show diha sa palibot sa St. Francis of Assisi Ocean Park samtang nagpaabot sa mga rider nga mahuman sa ilang challenge.

Ang matigom nga kwarta sa endurance challenge ihatag ngadto sa Children’s Legal Bureau, Inc. kinsa napili nga beneficiary sa Cebu Conqueror organizers. Theresa March Valle, CNU Intern, BDB (BANATNEWS)