Barangay kagawad naatlan sa buybust

CEBU, Philippines — Nadakpan sa buy-bust operation sa San Fernando Municipal Police Station usa ka Konsehal sa Barangay Sangat ug laing kauban niini ug gikatahong nakuhaan sila og shabu nga mobalor og P3,264 sa Barangay Pitalo sa maong lungsod.

Nagtingkagol sa prisuhan si Sangat Barangay Councilor Isabelo Umpad-Diolan, 49, ug kauban niini nga si Dennis Sarucam Caballero alyas “Dindin”, 42, parehong  molupyo sa Sitio Magtalisay, Barangay Balud sa Lungsod sa San Fernando.

Matud ni Police Major Mark Anthony Villanueva, hepe sa San Fernando Municipal Police Station ang target gyud nila mao si Cabellero apan adtong higayona naa sab didto ang barangay kagawad.

Base sa impormasyon sa kapulisan ang konsehal wala namaligya og illegal nga drugas apan mogamit lang kini.

Giangkon ni Villanueva nga nakuratan sila nga naa didto ang konsehal tungod kay isip elected- official siya unta ang katambayayong pagbatok sa ginadiling drugas.

“User lang siya, wala namaligya, mopalit lang ni siya og iyaha si Kagawad,” matud ni Villanueva.

Nag-backtracking ang kapulisan sa unsay background sa konsehal sanglit wala man kini rekord sa police station labot sa paghimo og illegal nga binuhatan.

Gikatakda nga pasakaan og kasong kalapasan sa paghupot ug pagmaligya og illegal nga drugas ang mga dinakpan. —/IBM (BANAT NEWS)