10-anyos nga bata gilugos sa silingan

CEBU, Philippines — Natingkagol karon sa detention cell sa kapolisan Dakbayan sa Mandaue ang 53-anyos nga lalaki human niini giingong gilugos ang 10-anyos nga batang babaye nga ilahang silingan.

Ang maong insidente nahitabo diha sa usa sa mga barangay sa Dakbayan sa Mandaue sa nilabay’ng Martes sa gabii.  Matud ni Police Patrolwoman Sheila Mae Rabao sa Mandaue Police Station 3 nga nireklamo kanila ang pamilya sa biktima sa susamang adlaw. Base sa imbestigasyon sa kapolisan nga sa wala pa mahitabo ang insidente ang biktima naglakaw diha sa gawas sa ilahang balay diin kalit lang nga gigunitan sa suspetsado ang kamot sa bata ug gidala kini diha sa sulod sa iyahang boarding house ug giamong-amongan.

Usa sa mga silingan kinsa nakabantay nga nigawas ang maong bata gikan sa boarding house sa suspetsado ang nisumbog sa amahan sa biktima.

Giingong gipugos sa pagpatug-an sa amahan ang biktima sa gibuhat sa suspetsado kaniya.

Ang bata nitug-an sa iyang amahan nga giamong-amongan siya sa suspetsado ug dali silang ni-report sa kapolisan. 

Ang kapolisan daling nialarma sa maong hitabot ug gisikop ang suspetsado. —Dannahli Pogado (BANAT NEWS)