PAGASA: Bisan og weak El Niño magdaginot sa tubig

CEBU, Philippines —  Ang Philippine Atmospheric, Geophysical and Astronomical Services Administration (PAGASA) Mactan nagkanayon nga “weak El Niño” ang pagsugod niining buwana hinungdan sa mga pag-uwan nga masinati gihapon sa kasadpang bahin sa nasud ug Dakbayan sa Sugbo.

Matud pa ni Engineer Al Quiblat, hepe sa PAGASA Mactan nga normal ra karon ang nasinati tungod usab sa nasinati nga habagat diin molungtad kini hangtud sa buwan sa Septiyembre.

Si Quiblat nagkanayon nga ang dakong epekto sa El Niño magsugod sa buwan sa Oktubre hangtud sa unang quarter sa sunod tuig.

Apan bisan pa sa weak El Niño nga nasinati sa rehiyon adunay 50 ngadto sa 60 porsyento nga kahigayonan nga mokusog pa kini.

Pahinumdum karon sa PAGASA nga samtang wala pa kini nahitabo mag-andam  ang katawhan diha sa ilang panimalay sama sa pagdaginot sa tubig ug magdala og kapote o payong aron makalikay sa mga sakit nga dala sa usab-usab nga lakat sa panahon.

Matud usab ni Quiblat nga tungod sa El Niño menos ang gidaghanon sa bagyo apan mas kusog kini kompara sa naandan sa mga nangaging tuig.

Awhag ni Quiblat nga kanunay’ng magminaw sa lakat sa panahon pinaagi sa mga ipanghatag nga weather forecast sa PAGASA aron malikay sa fake news. BDB (BANATNEWS)