Magtiayong polis nga nang-harass og media girelibohan

CEBU, Philippines — Presidential Task Force on Media Security (PTFoMS) midayeg sa Philippine National Police sa paspas nga aksyon niini batok sa magtiayong pulis nga nalambigit sa kaguliyang sa Brgy. Jones, Pastrana, Leyte diin 3 ka lokal nga miyembro sa press ang giharass samtang nagpahigayon og interbyu sa usa ka land reform beneficiary niadtong Biyernes, Hulyo 14, 2023.

Girelieve na sa ilang puwesto sila si PSSg Rhea May Baleos sa Sta. Fe Municipal Police Office ug ang iyang bana nga si PSSg Ver Baleos gikan sa Pastrana Municipal Police Office.

Niadtong Sabado ang PTFoMS nanawagan sa PNP sa Eastern Visayas alang sa dali nga imbestigasyon, ug ipahamtang ang pagdisiplina sa pipila ka sakop sa Pastrana Police Office sa probinsya sa Leyte.

Ang PTFoMS naalarma sa insidenting nahitabo niadtong Biyernes diin tulo ka mga news crew gikan sa San Juanico TV nga sila si Noel Tampil Sianosa Jr., Ted Allen Tomas, ug Lito A. Bagunas ang giharass.

Matud pa ni Tomas nga gipadala sila sa ilang management aron makighinabi sa magtiayong Virgilio ug Anecita Nogal sa Sitio Cancamartes, Bgy. Jones, Pastrana, kinsa nangangkon nga benepisyaryo sa reporma nga yuta ug tag-iya sa usa ka luna sa humay sa maong dapit.

Samtang nakig-estorya ang tulo ka lokal nga reporter sa mga Nogal, niabot usab si PSSg Rhea Mae Balejos ug nahitabo ang komprontasyon tali sa mga Balejos ug sa mga Nogal.

Nasayran nga ang yuta giprenda na sa laing tawo ngadto kang Baleos ug sa iyang bana.

Matud pa ni Tomas nga ang bana nga wala niya mailhi, mition pa sa iyang M-16 ngadto kanila.

nag-viral ang video sa insidente nga nakita nga pisikal nga giatake ni Baleos si Sianosa sa tinguha nga kuhaon ang iyang cellphone nga iyang gigamit sa pagrekord sa insidente ug pipila ka minuto ang milabay, daghang buto ang nadungog sa background. — CNU Intern/MEL (BANAT NEWS)