CCTVs gisubay bahin sa pangangkon sa gidagit ug gitulis nga Chinese

CEBU, Philippines —  Usa nalang ka kopya sa CCTV ang tan-awon sa kapulisan sa dakbayan sa Sugbo sa dili pa sila mopagawas og konklusiyon mahitungod sa giingong tulis nga nahitabo niadtong adlaw’ng Lunes nga naglambigit og usa ka negosyante nga Chinese National ug duha ka trabahante niini.

Gitutukan kini sa Cebu City Police Office(CCPO) kay gawas nga nakabalda kini sa kahapsay ug kalinaw sa siyudad sa Sugbo wala sab nagkadimao ang pamahayag sa mga biktima.

Unang gibutyag sa mga biktima nga sa Carbon Public Market sila gitulis ug gidagit dayon gidala sa Barangay Campo 4, dakbayan sa Talisay.

Apan dihang gipatudlo sa kapulisan sa Carbon Police Station 5 kun asa dapita sa Carbon Public Market nahitabo ang insidente ang mga biktima miingon nga sa Compaña Maritima na sab nahitabo ang insidente.

Gisusi sa Waterfront Police Station 3 ang lugar apan wala’y komosyon ingon man sakyanan nga nakita ug dihang gipangutana pag-usab ang mga biktima didto na sab sa Barangay Mabolo kini nahitabo.

Kini maoy rason nga ang Mabolo Police Station 4 pinangulohan ni Police Major Eraño Regidor nisusi sa mga CCTV footages sa dalan A. Soriano , Xiamen Street nga diin matud pa gidagit ang tulo.

“Wala tay mahimo biktima man kuno siya, atong tagaan og benefit of the doubt gihapon,” ni Regidor pa.

Ang Central CCTV nga iya sa Cebu City Government maoy katapusang CCTV tan-awon sa kapulisan diin makita niini ang dalan Juan Luna Avenue, A. Soriano Street ug Xiamen Street.

Si Cebu City Police Office Director Colonel Ireneo Dalogdog miingon nga kun mapatud-an nga namakak ang mga biktima pasakaan nila sila og kaso.

Nagpadala na sila og request sa Bureau of Immigration alang sa record check sa biktima aron matan-aw ang entrance ug exit niini sa Pilipinas, makita sa kapulisan ang tinud-anay nga identity niini ug unsay tumong niya sa pag-anhi sa nasud. IBM (BANATNEWS)