Caravan para sa gunowners gilusad sa CCPO

CEBU, Philippines — Nipahigayon og Caravan ang Cebu City Provincial Office (CCPO) uban sa koordinasyon sa Regional Civil Security Unit 7 (RCSU7) alang sa License to Own and Posses Firearms (LTOPF) ug Firearms Registration sa Police Community Relations (PCR) Month Huwebes, Hulyo 13, 2023.

Ang maong kalihokan naglakip og LTOPF Online Assistance, Neuro-Psychiatric Examination ug Drug Test Examination.

Gipangulohan kini sa CCPO City Director, Police Colonel Ireneo Dalogdog ug hepe sa RCSU7 nga si Police Lieutenant Colonel Cirilo Acosta Jr. ug mitambong si Mayor Michael Rama. Ang caravan inisyatiba kini sa kapolisan aron sayon nalang niadtong mga nanagiya og armas nga napaso na ang lisensiya nga makaproseso sa pag-renew niini nga dili hasol.

Giawhag  kadtong mga nanagiya og armas nga napaso na ang lisensiya sa pag-renew na niini aron dili mapasakaan og kaso.

Kadtong wala pay kwartang ikapa renew sa lisensiya mahimong modeposito una sa ilang armas sa pinakaduol nga buhatan sa kapolisan aron dili makasohan.

Sa pagkakaron, subsob ang kapolisan sa pagpahigayon og Oplan Katok, kampanya kini pagsubay sa mga panimalay sa mga gun owner nga wala pa maka renew sa lisensiya sa ilang armas.

Usa sab kini kabahin sa pangandam alang sa umaabot nga piniliay sa Barangay ug SK elections karong Oktubre ning tuiga. —Dannahli Pogado, Romeo Marantal, Decemay Padilla (BANAT NEWS)