MCIAA nagtinguha sa pagpataas sa airport sa Bantayan Island

CEBU, Philippines — Ang Mactan Cebu International Airport Authority (MCIAA) ug Probinsiya sa Sugbo nagplano nga patas-an ang runway sa Bantayan Island Airport gikan sa 1.2 kilometro ngadto sa 1.5 ka kilometro.

Subay kini sa planong pagpalambo pa sa maong tugpahanan sa Isla sa Bantayan aron makadawat og dugang mga eroplano.

Atol sa pagbisita sa mga opisyal sa MCIAA ngadto kang Gobernador Gwendolyn Garcia, ang general manager nga si Julius Neri nagkanayon ngadto sa gobernador nga ang kasamtangang runway nihaom sa mga rekisitos nga gikinahanglan alang sa mga gagmay nga eroplano apan dili kini igo alang sa mga dagko nga airline sama  Cebu Pacific ug Philippine Airlines.

Nakita sa mga opisyal nga kinahanglang patas-an ang runway hilabina nga ilang plano nga makatanyag og regular nga flights padulong sa Bantayan nga usa sa mga sikat nga tourism destinations sa Probinsiya sa Sugbo.

Matud ni Neri nga gilaraw pud nila ang pagbutang og firefighting facilities sulod sa maong tugpahanan sama sa fire station ug fire trucks aron adunay magamit dayon kon kinahanglan.

Si Garcia nihangop sa maong plano ug nagkanayon nga andam ang Kapitolyo nga motabang pinaagi sa pagdugang og palit og luna diha sa maong dapit.

Ang Bantayan Island Airport anaa kini nahimutang sa luna nga gipanag-iya sa Probinsiya sa Sugbo.

Nasayran nga gikatakda sa sunod bulan ang pagpirma sa tripartite agreement alang sa maong tinguha. (BANAT NEWS)