Bantayan Bay buksan og balik ngadto sa publiko

CEBU, Philippines —  Human sa pipila ka bulan nga pagdili sa pagkaligo diha sa Bantayan Bay sa Barangay Catarman, Lungsod sa Cordova buksan na kini og balik ngadto sa publiko karong umaabot Hulyo 16, 2023.

Kini maoy gianunsiyo ni Cordova Mayor Cesar “Didoy” Suan atoll sa flag raising ceremony ug weekly report niini niadtong Hulyo 3, 2023 diha sa Cordova Municipal Grounds.

Nasayran nga pakaligoan na og balik sa lokal nga kagamhanan ang dagat diha sa maong lugar human nga nikunhod ang fecal coliform bacteria sa tubig sa dagat.

“Now it is completely, nalimpiyo na gyud atong dagat. From 2, 400 (most probable number) mpn, .8 (mpn) percent na lang ang kagaw nga naa. Dili pod ko moingon nga pwede na ninyo imnon ha, pero ing-ana na kalimpiyo atong dagat”, matud ni Suan.

Ang allowable o gitugot nga level lang niini anaa ra sa 100 mpn sa matag 100ml.

Si Suan nagkanayon nga daghan sila og gihimo aron mabalik sa kalimpiyo ang dagat sa ilang lungsod sama sa kanunay nga monitoring ug clean up drive.

Adunay duha ka semana aron pangandaman sa LGU ang pagbukas sa Bantayan Bay diin matud sa mayor nga apil sa ilang himuon mao ang pagbutang og safety ug security measures alang sa publiko, adunay pansayan nga siguradohon nga kanunay’ng limpiyo.

Tugotan na usab ang mga ambulant vendors nga makabaligya og balik apan walay cottages nga itukod og balik.

Ang mga banker tugotan na usab nga mamasahero aron ihatud diha sa may mangrove area ug sand bar ang mga bisita.

Ipaubos usab sa seminar ang mga stakeholder nga nag-operate sa Bantayan Bay apil na ang mga bangka operators ug manindahay aron mamentinar ang kalimpiyo sa maong dapit.

Sayo pa, gidid-an ang publiko sa pagkaligo diha si Bantayan Bay human nasuta sa Environmental Management Bureau (EMB) nga taas ang level sa hugaw o coliform bacteria sa maong dapit diin usa sa gitumbok nga hinungdan niini mao ang floating cottages nga wala kaayo ma-regulate diha sa maong area.  BDB (BANATNEWS)